3Jo | BOJ | STEP |

3 JON

3 John

1 E Kristen naŋgo gate. O ijo was bole Gaius, e na anjam endi neŋgreŋyosim ni qa qariŋyonum. E ni bole mermqai. E ni tulaŋ qalaqalaimeqnum.

2 O ijo was bole, e ni qa Qotei pailyeqnum. Yim a na ni aqaryaimimqa ino wau kalil geregere brantqas. Osim ni segi dego bole sqam. E qalieonum, ino qunuŋ bole unu. 3 Nami Kristen was qudei naŋgi e nubqa bosib endegsib merbeb, “Gaius a anjam bole dauryeqnu.” Degsib merbonab e qusim tulaŋ areboleboleibej. Od, e qalieonum, ni anjam bole dauryeqnum. 4 Ijo aŋgro naŋgi anjam bole dauryeqnub e di quoqnsim deqa e tulaŋ areboleboleibeqnu. Ijo arebolebole dena arebolebole kalil tulaŋ buŋyejunu.

Gaius a na aqa Kristen was naŋgi geregereinjreqnu

5 O ijo was bole, ni anjam bole dauryoqnsim Kristen was naŋgi geregereinjreqnum. Osim tamo qudei naŋgo ulatamu ni qaliesai qaji naŋgi dego ni na geregereinjreqnum. Di ni kere yeqnum. 6 Kristen was qudei naŋgi ino qalaqalaiyo kumbra deqa saeqnab Kristen tamo uŋgasari endia unub qaji naŋgi queqnub. Ariya Kristen was naŋgi di olo tigelosib walwelqa laqnibqa ni na iŋgi iŋgi qa naŋgi aqaryainjre. Ni degyqam di kumbra bolequja. Ni Qotei aqa areqalo dauryosim naŋgi aqaryainjrim naŋgi gilqab. 7 Tamo naŋgi di Yesus aqa wau ojqajqa maroqnsib deqa naŋgi aqa anjam osi walweleqnub. Ariya naŋgi walweloqnsib naŋgi sawa bei bei qaji tamo naŋgoq dena iŋgi iŋgi osaieqnub. 8 Deqa iga na tamo deqaji naŋgi aqaryainjroqnqom. Iga degyqom di iga naŋgi koba na wau qujai sosim Qotei aqa anjam bole siŋgilatoqnqom.

Diotrefes a kumbra uge yeqnu

9 Nami e anjam qudei neŋgreŋyosim Kristen tamo uŋgasari nuŋgo qureq di unub qaji naŋgi qa qariŋyem. Ariya Diotrefes a tulaŋ diqoqnsiqa a na tamo kalil naŋgi buŋnjrsim aqa segi ñam soqtqajqa siŋgilaeqnu. Deqa a gago anjam di quetgosaieqnu. 10 Deqa e niŋgi qa bosiy aqa kumbra deqa niŋgi olo saiŋgwai. A iga qa anjam uge uge mareleŋeqnu. Di segi sai. A na Kristen was naŋgi aqa talq joqsi gilqa urateqnu. Yeqnaqa tamo qudei naŋgi na Kristen was qudei naŋgi naŋgo talq joqsi gilqa laqnab a na naŋgi olo getentnjreqnu. Osiqa naŋgi Qotei tal miligiq gilqa dego saidnjreqnu.

Demitrius a kumbra bole yeqnu

11 O ijo was bole Gaius, ni kumbra uge dauryaim. Ni kumbra bole segi daurye. Tamo a kumbra bole yqas di a Qotei aqa tamo sqas. Ariya tamo naŋgi kumbra uge uge yeqnub qaji naŋgi Qotei unqa keresai.

12 Tamo kalil naŋgi Demitrius a qa mareqnub, aqa kumbra bole. Qotei aqa anjam bole a dego tamo bulosiqa Demitrius aqa kumbra bole qa mareqnu. E dego a qa mareqnum, aqa kumbra bole. Ni qalie, ijo anjam di bole.

Jon a Gaius unqajqa bosim a ombla anjam marqab

13 E anjam gargekoba neŋgreŋyosiy ni qa qariŋyqa kere. Ariya e neŋgreŋyqasai. 14 Sokiñala e ni qa bosiy ni numsiy aqo aiyel ombla anjam marqom.

15 Ni are lawo na soqnime. Kristen was endia unub qaji naŋgi ni qa kaiye anjam qariŋyonub. E kamba dego Kristen was kalil ni koba na unub qaji naŋgi qa kaiye anjam qariŋyonum. Ijo kaiye anjam di ni na naŋgi minjrime.